knowledge hub: August 2017

గురుకుల నియామకాలకు తొలగిన అడ్డంకి

హైదరాబాద్‌: గురుకుల విద్యా సంస్థల్లో బోధన, బోధనేతర సిబ్బంది నియామకానికి అడ్డంకి తొలగిపోయింది. ఉద్యోగాల భర్తీకి సంబంధించిన జీవో 1247 అమలును నిలిపివేస్తూ గతంలో సింగిల్ జడ్జి ఇచ్చిన మధ్యంతర ఉత్తర్వలను హైకోర్టు ధర్మాసనం సస్పెండ్ చేసింది. బీసీ, గిరిజన, మైనారిటీ, సాంఘిక సంక్షేమ గురుకుల సొసైటీల్లో సుమారు 7000 ఉద్యోగాల భర్తీ చేయాలని ప్రభుత్వం నిర్ణయించింది. మహిళల గురుకులాల్లో పోస్టులన్నీ మహిళలకే కేటాయించాలని నిర్ణయించిన ప్రభుత్వం జీవో 1247ని జారీ చేసింది. ఆ జీవో ఆధారంగా మహిళల గురుకులాల్లో ఉద్యోగాల కోసం కేవలం మహిళల నుంచి దరఖాస్తులను ఆహ్వానిస్తూ రాష్ట్ర పబ్లిక్ సర్వీస్ కమిషన్ ప్రకటనలు జారీ చేసింది. ప్రభుత్వ ఉత్తర్వులను సవాల్ చేస్తూ హైకోర్టులో పురుషులు వ్యాజ్యం దాఖలు చేశారు. జనరల్ కేటగిరీ ఉద్యోగాలను పూర్తిగా మహిళలకే కేటాయించి పురుషుల‌ను అనర్హులుగా పేర్కొనడం చట్టవిరుద్ధమని వాదించారు. స్పందించిన హైకోర్టు సింగిల్ జడ్జి జీవో అమలును నిలిపివేస్తూ గతంలో మధ్యంతర ఉత్తర్వులు జారీ చేసింది. దీంతో గురుకుల ఉద్యోగ నియామక పరీక్షలన్నీ టీఎస్పీఎస్సీ వాయిదా వేసింది. సింగిల్ జడ్జి ఉత్తర్వులను సవాల్ చేస్తూ రాష్ట్ర ప్రభుత్వం హైకోర్టు ధర్మాసనం ఎదుట అప్పీల్ దాఖలు చేసింది. హైకోర్టు తాత్కాలిక ప్రధాన న్యాయమూర్తి జస్టిస్ రమేష్ రంగనాథన్ నేతృత్వంలోని ధర్మాసనం ఇవాళ అప్పీల్ పై విచారణ జరిపింది. ఏ పోస్టు ఎవరితో భర్తీ చేయాలనే పాలనపరమైన నిర్ణయం తీసుకొనే అధికారం ప్రభుత్వానికి ఉంటుందని అడ్వొకేట్ జనరల్ వాదించారు. గతంలో సుప్రీంకోర్టు ఇచ్చిన పలు కేసులను వివరించారు. స్పందించిన ఉన్నత న్యాయస్థానం గతంలో సింగిల్ జడ్జి ఇచ్చిన ఉత్తర్వులను నిలిపివేస్తూ మధ్యంతర ఉత్తర్వులు జారీ చేసింది. పూర్తి స్థాయి వాదనల కోసం కేసును వారం రోజులకు వాయిదా వేసింది. జీవో అమలుపై ఆటంకం తొలగిపోవడంతో.. ఉద్యోగాల భర్తీ ప్రక్రియపై యథాతథంగా ముందుకు వెళ్లేందుకు టీఎస్పీఎస్సీ సన్నాహాలు చేస్తోంది. వాయిదా పడిన పరీక్షలకు ఒకటి, రెండు రోజుల్లో కొత్త తేదీలను ప్రకటించేందుకు కమిషన్ రంగం సిద్ధం చేస్తోంది.